Awewe Dulang Tinande teh buku kumpulan carita pondok nu ngagambarkeun kahirupan urang Sunda dina tilu jaman: jaman normal (jaman Hindia Belanda), jaman Jepang (1942-1945), jeung jaman sabada Indonesia merdeka. Dina ieu buku, Tjaraka, nu ngalaman kahirupan dina eta tilu jaman, hade pisan ngagambarkeun kondisi manusa Sunda dina masing-masing jaman, sanajan sakapeung karikatural. Nu panghadena nyaeta "Haturan Agan Nunung Rajainten" nu mangrupa surat atawa panineungan anu ditujukeun ka Agan Nunung Rajainten nu geus maot, ngeunaan pangalaman "abdi" jeung Agan Nunung. Ku cara kitu, pangarangna sacara langsung ngagambarkeun ayana panta-panta sosial dina pakumbuhan Sunda mangsa harita. Carita-carita dina ieu buku kabehanana ngabuktikeun yen Tjaraka teh pangarang anu seukeut paniten sosialna, sarta mampuh ngawujudkeun hasil panitenna tea dina wangunan carita nu ngagunakeun basa Sunda nu hirup hurip.